剧情大纲
有一个叫做菲尔(Phil) 嘅电视天气报导员，佢为人自私自大，成日觉得自己怀才不遇，而且又口不择言，所以佢身边嘅人都觉得佢好令人讨厌。
有一次佢被派去宾夕法尼亚州 (Pennsylvania) 嘅一个小镇 Punxsutawney 采访土拨鼠节；呢个镇有个习俗，就係每年嘅二月二日冬天将要过去嘅时候，镇民都会喺呢日聚集埋一齐，睇吓一只又係叫做菲尔 (Phil) 嘅土拨鼠会唔会出嚟「讲嘢」，如果佢会叫，即係冬天好快过去，而春暖将会降临，相反如果佢唔叫，即係冷天可能仲会持续一段时间。报导员菲尔联同美丽女导演丽塔 (Rita) 同埋摄影师拉瑞 (Larry)三个人一齐嚟到呢个小镇，喺菲尔下塌咗一间旅馆之后，佢嘅奇幻旅程就正式开始。
第二日，即係二月二日土拨鼠节嘅正日。呢一朝早，菲尔床头嘅收音机闹钟准时六点响起，轻松嘅民谣带住菲尔去梳洗更衣，然后开始一日嘅工作；当菲尔同女导演三人完成哂工作之后就谂住离开，点知因为天气报告话外围天气开始变坏，离开普苏塔尼嘅路已经俾大雪封咗，于是菲尔就被迫要留多一晚。到第二朝瞓醒，嗰闹钟搭正六点响起，而收音机里面亦响起同一首民谣，菲尔发现电台主持讲嘅嘢同前一日一样，佢以为电台播返前一日嘅录音带，不过佢都觉得奇怪，于是探头望出窗口，见到又有人流向住土拨鼠节嘅会场进发。佢出门口之后，所遇到嘅人同埋事都曾经发生过，土拨鼠节个会场又係有好多人；菲尔见到女导演同摄影师，点知佢哋又係讲返同一样嘅开场白，菲尔喺报导紧嘅时候越谂越乱，于是劈低支咪走咗……自此之后，菲尔周而复始咁过住同一日，一到六点就扎醒，一样都係土拨鼠节，而佢根本唔知点先可以脱离。有一个土拨鼠节，菲尔终于发咗癫，于是谂尽方法寻死，但係佢呢头死，嗰头扎醒又係早上六点闹钟响起嘅时候，又係播住同一首民谣，又係土拨鼠节。
期间菲尔有啲钟意美丽女导演丽塔，于是发奇想，想喺一日之内令女导演对自己改观，搵机会同佢上床；喺每一日都係同一日嘅情形之下，菲尔利用无限嘅时间一啲啲咁去了解丽塔，但係始终都冇办法取得丽塔嘅完全信任，就算有一次丽塔俾菲尔说服陪佢喺间房度等天光，到第二朝床上一样剩返菲尔一个，一样係回复返土拨鼠节。最后菲尔明白到，与其冇方法要人钟意自己，不如令自己嘅每一个同一日都过得充实同埋有意义，等到万一可以脱离框框时会有个新嘅未来，于是佢利用无限嘅时间去学咗好多唔同嘅手艺去增值自己，同埋因为佢已经好熟咁知道每日喺边度会有咩事发生，佢亦会积极咁周围去帮嗰啲要帮忙嘅人；不过当中都有个小遗憾，就係唔可以阻止其他人生命嘅终结。
喺某一个土拨鼠节，菲尔感动人心嘅现场报导，令到在场所有专注听佢讲嘢嘅人都大拍手掌；而喺呢日嘅夜晚，丽塔去到镇上开早春庆祝会嘅小区会堂，只见到菲尔喺舞台度弹住一手轻快兼且熟练嘅钢琴，之后人人都争住向佢打招呼，成为咗席上最闪耀嘅人；原来一日嚟佢帮过几个女人架车换呔，所以几个女人都走埋嚟多谢佢；佢帮过一个食嘢啃亲嘅肥佬吐返粒核出嚟，于是两公婆又走嚟多谢佢；佢鼓励咗一对三心二意想结婚但又唔放心嘅情人，于是呢对准新人又嚟多谢佢……到到庆祝会嘅压轴环节，就係由镇上面嘅女人出钱竞投王老五共度良宵嘅慈善项目，菲尔一上台就个个争住开价要投佢，而丽塔唔知点解之下就倾尽成副身家竞投，终于俾佢投到菲尔。
两个人离开咗小区会堂，菲尔用好绅士嘅态度去对待丽塔，陪佢倾计，仲喺条街度整咗个好靓嘅冰雕头像送俾佢，令到丽塔大为感动，仲接受咗菲尔嘅示爱，不过菲尔只係发乎情止乎礼，冇再进一步向丽塔要求；当晚丽塔去到菲尔嘅宿舍，两个人喺张床度倾倾吓大家就瞓着咗……
六点钟，收音机闹钟又再响起，菲尔慢慢掰开双眼，心谂又要预备土拨鼠节嘅一日，点知一只懒洋洋嘅手打横按熄咗个闹钟，菲尔唔敢相信自己眼睛，但係呢只手己经暖暖咁抱住菲尔，手嘅主人就係丽塔；菲尔弹起身探头望出窗外，见到出面阳光衬住一片白蒙蒙嘅雪地，街上面亦静英英咁冇哂涌去睇热闹嘅人……菲尔已经跳出时间嘅循环，土拨鼠节终于过去！
菲尔嘅人生观完全改变，而有情人亦都终成眷属。
本作品采用知识共享 署名-非商业性使用-相同方式共享 3.0 协议进行许可，欢迎转载。转载请保留署名（杯茶博客）及本文链接（http://www.buicaa.com/2354/），谢谢。
